Европада "Борис" бороонунан жабыркагандардын арасында кыргызстандыктар жок – ТИМ
11-сентябрдан бери 1120дан ашык катуу жаан-чачындар катталды
Европаны каптаган "Борис" бороонунан жабыркагандардын арасында кыргызстандыктар жок. Бул тууралуу Кыргызстандын чет өлкөлөрдөгү мекемелеринин маалыматына таянып Тышкы иштер министрлиги билдирет.
Борбордук жана Чыгыш Европаны каптаган бороон көптөгөн кыйроолорго жана адам курмандыктарына алып келген.
“Борис” бороону Борбордук Европага ушул айдын орточо көрсөткүчүнөн беш эсе көп жаан алып келип, 11-сентябрдан 16-сентябрга чейин катуу суу ташкындарына себеп болду, айрыкча Польша, Чехия, Словакия, Австрия, Венгрия, Словения жана Румынияны каптаган. Бул өлкөлөрдө кеңири аймактарды суу каптап, жүз миңдеген адамдар эвакуацияланган.
Суу ташкыны кеминде 26 адамдын өмүрүн алды: Польшада 10, Румынияда 7, Австрияда 5 жана Чехияда 4 адам.
Белгиленгенлей, табигый кырсык турак жайларга, соода объектилерине, транспорт каражаттарына, инфраструктурага жана агробизнеске олуттуу зыян келтирди.
Европанын катаал аба ырайы маалыматтар базасынын (ESWD) маалыматына ылайык, 11-сентябрдан бери 1120дан ашык катуу жаан-чачындар катталды. Австриянын жана Чехиянын айрым жерлеринде жаан 300 миллиметрге жетти же андан ашты, ал эми Польшанын түштүк-батышында айрым метеостанциялар 24 сааттын ичинде 150 миллиметрден ашык жаан жаагандыгын катташты.
Окуя метеорологиялык моделдер тарабынан алдын ала болжолдонгон жана катуу жаан-чачын башталганга чейин бир нече күн мурун жогоруда аталган өлкөлөрдө коомдук эскертүүлөр жарыяланып коопсуздук чаралары күчөтүлгөн.
Кыргызстандын чет өлкөлөрдөгү мекемелери ошондой эле мессенджерлер аркылуу КРнын жарандары үчүн сактык чаралары жөнүндө маалыматтарды жөнөтүп, ыкчам телефондор иштеп жарандар менен байланышты кармап турууда:
Австриядагы элчилик: +43 667 7687295;
Венгриядагы элчилик: +36302377207;
Германиядагы элчилик: +4917660929123;
Украинадагы элчилик: +380 99 114 83 07.