АКШ атып түшүргөн НЛОнун тагдыры белгилүү болду
Жакында CTV News каналы НЛО боюнча маалымат берүү өтүнүчүн Канаданын Улуттук коргоо министрлигине жөнөткөн
АКШынын F-16 истребители атып түшүргөн НЛОнун калдыктары табылганы ачыкталды. Бул тууралуу чет элдик басылмалар CTV News каналынын маалыматына таянып жазып чыгышты.
Маалыматка карганда, былтыр февраль айында АКШ менен Канаданын чек арасында сегиз бурчтуу объект америкалыктар тарабынан атып түшүрүлгөн. Анын калдыктары Гурон көлүнө түшкөн. Окуя эки өлкөнүн чек арасындагы болгонуна байланыштуу объектин калдыктарын издөө иштерине Канаданын Королдук атчан полициясы менен АКШнын Жээк коопсуздук кызматы тартылган. Бирок майнап чыкпагандыктан издөө иштери октябрь айында токтотулган.
Ага ылайык, жакында CTV News каналы НЛО боюнча маалымат берүү өтүнүчүн Канаданын Улуттук коргоо министрлигине жөнөткөн. Натыйжада, министрлик учактын сыныктары табылып, андан ары талдоо үчүн лабораторияга жөнөтүлгөнүн билдирген. Бирок изилдөөнүн жыйынтыктары тууралуу толук маалымат берген эмес. Табылган калдыктар улуттук коопсуздукка коркунуч туудурбай турганын гана белгилеп, тынчсыздануу жоктугун маалымдашкан.