Катарлык дарыгерлер угуусу начар кичинекей кыргызстандыктарга бекер операция жасашат

Катарлык дарыгерлер угуусу начар кичинекей кыргызстандыктарга бекер операция жасашат. Бул тууралуу Саламаттык сактоо министрлигинен билдиришти.

Маалыматка ылайык, 24-октябрда Эне жана баланы коргоо улуттук борборунда Катардан келген отохирург-дарыгерлер тобу тарабынан уюштурулган кайрымдуулук акциясы башталат. Иш-чаранын алкагында угуусу начар балдарга кохлеардык имплантация боюнча бекер операциялар жасалат.

Бейтаптарды тандоо этабы башталды жана ал 20-сентябрга чейин созулат. Операцияга эки тараптуу дүлөйлүгү, 4 даражадагы эки тараптуу сенсоневралдык угуусу начар жана постлингвалдык дүлөйлүгү бар 5 жашка чейинки балдар кабыл алынат. Операция алдында балдар комплекстүү текшерүүдөн өтүп, медициналык комиссиядан өтүшү керек.

Бул операциялар КР Саламаттык сактоо министрлиги менен Катар өкмөтүнүн ортосунда Кайрымдуулук жана ислам иштери министрлиги тарабынан кол коюлган меморандумдун аркасында ишке ашырылууда. Катар тарап кохлеардык импланттарды сатып алууга, хирургиялык операцияларга, ошондой эле кыргызстандык хирургдарды жана көмөкчү медициналык персоналды окутууга кеткен бардык чыгымдарды көтөрөт.

2020-жылдан бери Эне жана баланы коргоо улуттук борборундаушундай 160тан ашык операция жасалган. Бейтаптар аталган борборго Дүйшөмбүдөн Жумага чейин саат 12:00дөн 16:00гө чейин ЛОР-дарыгердин кабинетине (8-корп., 1-кабат) кайрылса болот, жанына мурда жүргүзүлгөн текшерүүлөрдүн жыйынтыгын ала келүүсү шарт.