Эвандер Холифилд менен Александр Поветкин Бишкекте өтө турган профессионалдык бокс боюнча эл аралык кеченин ардактуу коноктору болушат

2026-жылдын 3-июлунда Бишкек шаарындагы «Жаштык Арена» спорт комплексинде профессионалдык бокс боюнча ири эл аралык кече өтөт. Көрүүчүлөрдү жети өлкөнүн спортчулары катышкан сегиз беттеш, эки титулдук таймаш, концерттик программа, ошондой эле дүйнөлүк бокстун легендалары Эвандер Холифилд менен Александр Поветкиндин келиши күтөт.

Турнир Кыргыз Республикасынын Жогорку Кеңешинин Төрагасы Марлен Маматалиевдин колдоосу менен өткөрүлөт. Бир рингде Кыргызстандын, Казакстандын, Өзбекстандын, Тажикстандын, Россиянын, Таиланддын жана Кубанын профессионал боксчулары күч сынашат.

Кеченин негизги максаты — кыргызстандык спортчулар үчүн күчтүү эл аралык аянтча түзүү, алардын профессионалдык карьерасын өнүктүрүүгө, расмий рекордун толуктоого жана Кыргызстандын башка мамлекеттер менен болгон спорттук байланыштарын бекемдөөгө шарт түзүү.

Турнирдин алкагында алты рейтингдик жана эки титулдук беттеш өткөрүлөт. Беттештин жыйынтыгына карабастан, бардык катышуучуларга акчалай сый акы каралган.

Кеченин эки башкы беттеши

Борбордук беттештердин биринде кыргызстандык Ыктыяр Нышанов Россиянын өкүлү Михаил Тарханов менен күч сынашат. Беттеште Кыргыз Республикасынын Жогорку Кеңешинин Төрагасынын атайын куру ойнотулат.

Экинчи титулдук беттеш Кыргызстандын профессионалдык бокс лигасынын куру үчүн өтөт. Рингге кыргызстандык боксчу Акжол Сулайманбек уулу менен Таиланддын тажрыйбалуу өкүлү Файом Кампее чыгат.
Бул таймаш кеченин эң маанилүү спорттук сыноолорунун бири болмокчу. Кыргызстандын боксчусуна профессионалдык рингде олуттуу тажрыйба топтогон күчтүү атаандаш каршы турат.

Турнирдин толук файт-карды

Титулдук беттештер:
— Ыктыяр Нышанов, Кыргызстан — Михаил Тарханов, Россия. Кыргыз Республикасынын Жогорку Кеңешинин Төрагасынын куру үчүн беттеш;
— Акжол Сулайманбек уулу, Кыргызстан — Файом Кампее, Таиланд. Кыргызстандын профессионалдык бокс лигасынын куру үчүн беттеш.

Рейтингдик беттештер:
— Өмүрбек Бекжигит уулу, Кыргызстан — Абдугафор Вахобов, Тажикстан;
— Даниэль Абдырахманов, Кыргызстан — Артём Никитенко, Россия;
— Нурадин Рустамбек уулу, Кыргызстан — Ибратбек Давлатов, Өзбекстан;
— Мирзохид Имамназаров, Кыргызстан — Вега Акоста, Куба;
— Азизбек Ходжаев, Кыргызстан — Алпысбай Мейрамбек, Казакстан;
— Анваржан Ходжиев, Кыргызстан — Серик Оразгали, Казакстан.

Кыргызстандын өкүлдөрү өз күйөрмандарынын алдында ар башка улуттук бокс мектептерин көрсөткөн атаандаштарга каршы чыгууга мүмкүнчүлүк алышат. Турнирдин файт-кардына профессионалдык карьерасын жаңыдан баштап жаткан келечектүү спортчулар да, эл аралык беттештерде тажрыйба топтогон боксчулар да киргизилди.

Дүйнөлүк бокстун легендалары Бишкекте

Турнирдин ардактуу конокторунун бири — биринчи оор жана оор салмак категорияларында абсолюттук дүйнө чемпиону болгон, дүйнөлүк спорт тарыхындагы эң белгилүү боксчулардын бири Эвандер Холифилд.

Ошондой эле кечеге Олимпиада чемпиону, ышкыбоздор арасында дүйнө чемпиону жана профессионалдар арасында WBA версиясы боюнча мурдагы дүйнө чемпиону Александр Поветкин катышат.

Мындай деңгээлдеги спортчулардын Кыргызстанга келиши турнирдин катышуучулары үчүн гана эмес, жаш кыргызстандык боксчулар, машыктыруучулар жана спорт күйөрмандары үчүн да маанилүү окуя болмокчу.

Эвандер Холифилд менен Александр Поветкин турнирге ардактуу конок катары чакырылган жана беттештерге катышпайт.

Эл аралык бокс кечесинин ардактуу конокторунун катарында Борбор Азиянын атактуу спортчулары да болот. Алардын бири — легендарлуу өзбек боксчусу Мухаммадкадыр Абдуллаев. Ал Сиднейде өткөн 2000-жылкы Олимпиада оюндарынын чемпиону, дүйнө жана Азия чемпиону, Азия оюндарынын жеңүүчүсү, ошондой эле эгемендүү Өзбекстандын жайкы спорт түрлөрү боюнча алгачкы Олимпиада чемпиону.
Мындан тышкары, турнирге Казакстандын өкүлү Канат Ислам келет. Ал 2008-жылкы Олимпиада оюндарынын жана дүйнө чемпионатынын коло байге ээси, профессионалдык бокста WBO жана WBA версиялары боюнча эл аралык титулдардын ээси.

Эгемендүү Кыргызстандын профессионалдык бокс тарыхындагы алгачкы эл аралык турнир жана өнүгүүнүн жаңы этабы

Турнирдин уюштуруу комитетинин курамына профессионалдар арасында жети жолку дүйнө чемпиону Орзубек Назаров, Кыргызстандын профессионалдык бокс лигасынын президенти Шайлообек Атазов, лиганын биринчи вице-президенти Артур Медетбеков, бокс боюнча эл аралык калыс Абдималик Айтиев, СССРдин спорт чебери Данияр Жусубалиев, Кыргызстандын профессионалдык бокс лигасынын башкы катчысы Азамат Асангожоев жана «Келечек» промоушенинин директору Келечек Оросбек уулу кирди.

Уюштуруучулардын пикиринде, эл аралык турнирлерди туруктуу өткөрүү кыргызстандык спортчуларга профессионалдык рингге көбүрөөк чыгууга, эл аралык спорт уюмдарынын көңүлүн бурууга жана дүйнөлүк рейтингдердеги ордун акырындык менен жогорулатууга шарт түзөт.

Мындай бокс кечелеринин өлкө ичинде өткөрүлүшү өзгөчө мааниге ээ. Кыргызстандын боксчулары өз күйөрмандарынын колдоосу алдында рингге чыгышса, көрүүчүлөр Бишкекте эл аралык деңгээлдеги профессионалдык боксту көрүүгө мүмкүнчүлүк алышат.

Билеттердин баасы 500 сомдон башталат. Билеттерди Kassir.kg улуттук билет операторунун платформасынан сатып алууга болот.