Бишкекте уюшкан кылмыштуу топтун мүчөсү өзүн бай ишкер катары тааныштырып, жарандын 12 миң долларын ээлеп алган
Алдамчы кымбат баалуу жол тандабас унаасын сатып алганы жаткандыгын, ага акча жетишсиз болгонун айткан
Бишкек шаарынын Ленин РИИБге жаран кайрылып, анын ишенимине кирип, пайдалуу келишим түзөбүз деген шылтоо менен 12000 АКШ долларын ээлеп алган адамга карата тиешелүү чараларды көрүп берүүлөрүн суранган. Жабырлануучуга ири материалдык чыгым келтирилген.
Аныкталгандай, шектүү өзүн автоунаалар менен алектенген ишкер катары тааныштырып, «Тойота-Лендкрузер 200» үлгүсүндөгү автоунааны сатып алууну көздөп жатканын, бирок акча каражаты жетпей жатканын айткан. Чала тааныш адамдын айткандарына ишенген жабырлануучу ири өлчөмдөгү акча каражатынан кол жууган. Акча каражатын алган соң шектүү белгисиз тарапка изин жашырып качып кеткен.
Бул факты КЖБРге катталып, Бишкек шаарынын Ленин РИИБи Кыргыз Республикасынын Жазык кодексинин 204-беренеси (Алдамчылык) менен сотко чейинки өндүрүш катталган.
Тергөөнүн тапшырмасынын алкагында ИИМдин КМКнын Үчүнчү башкармалыгынын ыкчам кызматкерлери ыкчам-иликтөө иш-чараларын жүргүзүшүп, шектүү 1983-жылы туулган С.В.нын кайда жүргөндүгү аныкташкан. Жогорудагы жаран кармалып, Кыргыз Республикасынын Жазык-процесстик кодексинин ченемдерине ылайык тиешелүү чараларды көрүү үчүн тергөө органдарына жеткирилген.
ИИМдин Криминалдык милиция кызматынын маалыматы боюнча жаран С.В. уюшкан кылмыштуу топтун мүчөсү катары ИИМдин ыкчам каттоосунда турат.
Азыркы учурда иликтөө иштери жүрүп жатат. Кармалган жарандын башка алдамчылык фактыларына тиешеси бардыгы текшерилүүдө.
ИИМдин Басма сөз кызматы
Фото www