Бишкекте түтүн. Мэр келечекте жылуулук системасын кайра жаралуучу энергия булактарына өткөрүүнү сунуштады
Өзгөчө кырдаал комиссиясынын бардык мүчөлөрүнө борбор калаанын абасынын сапатын жакшыртуу боюнча сунуштарды киргизүү тапшырылды
Бишкек шаарынын мэри Эмилбек Абдыкадыровдун төрагалыгы алдында борбор калаанын муниципалитетинде абанын булганышы боюнча ведомстволор аралык кезексиз комиссиянын кезектеги жыйыны өттү.
Жыйынга мэриянын түзүмдүк бөлүмдөрүнүн өкүлдөрү, министрлик жана ведомстволордун өкүлдөрү катышты.
Чогулгандар маселени талкуулап, борбордогу абанын сапатына таасирин тийгизген маселелер боюнча өз сунуштарын айтышты. Тактап айтканда, ченемдик укуктук актыларга өзгөртүүлөрдү киргизүү жана экологиялык коопсуздук боюнча чараларды көрүү маселелери талкууланды.
Жүргүнчүлөрдүн коопсуздугун камсыздоо үчүн отканаларды газга өткөрүү, борбор калаанын турак жайларын газдаштырууну кеңейтүү, жеке транспортту көзөмөлдөөнү жакшыртуу маселеси каралды.
Мындан тышкары, жол өтмөктөрдү куруу жана кошумча тилкелерди уюштуруу, коомдук транспорттун экологиялык жактан таза түрлөрүн сатып алуу маселелерин көтөрүштү. Биз унааларыбыздын экологиялык стандарттарга шайкеш келүүсүн текшерүүнү, анын ичинде катализаторлорго болгон муктаждыкты эске салууну талкууладык.
Башкармалыктарга жана шаардык кызматтарга борбор калаадагы абанын сапатынын индексин жакшыртуу боюнча сунуштарды киргизүү тапшырылды. КР Гидрометборборунун маалыматы боюнча, Бишкек шаарында абанын булганышын көзөмөлдөөчү 50 датчик, 7 стационардык пост жана автоматтык станциялар бар. КР Гидрометборборунун өкүлү ошондой эле абанын сапатын баалоонун андан аркы анализин түзүүдө метеорологиялык кызматтын берген маалыматтарына таянуу керектигин белгиледи.
Мэр келечекте жылуулук системасын кайра жаралуучу энергия булактарына өткөрүү, жылуулуктун альтернативдүү түрлөрүн жана энергияны үнөмдөөчү системаларды киргизүү мүмкүнчүлүгүн кароо керектигин белгиледи.
Чогулгандар автотранспортторду стандартка ылайыкташтыруу үчүн жеке транспортторду лицензиялоо жана ЖЭБ-2нин курулушун да көтөрүштү.
Транспорт жана коммуникациялар министрлиги Чүй облусунун Курманжан Датка көчөсүнөн Сокулук районунун ички иштер постуна чейинки 34 чакырым айланма жолду төрт тилкеге кеңейтүү аркылуу куруу долбоору боюнча маалымат таратты.
Ички иштер министрлигинин маалыматы боюнча, Бишкекке күнүнө 160 миңден ашык унаа кирет. Мындай маалыматтар «Коопсуз шаар» долбоорунун алкагында орнотулган видеокөзөмөл камераларынын аркасында алынды.
Жаратылыш ресурстары, экология жана техникалык көзөмөл министрлиги күйүүчү-майлоочу майларды К5 стандартына өткөрүү жана атмосферага көмүр кычкыл газын чыгаруу боюнча талаптарды күчөтүү сунушун киргизди.
Жыйындын жыйынтыгында комиссиянын бардык мүчөлөрүнө борбор калаадагы абанын сапатын жакшыртуу боюнча сунуштарды киргизүү тапшырылды.
Бишкек шаарынын мэриясы
Сүрөт www