Акылбек Жапаров БУУнун Өнүктүрүү Программасынын делегациясы менен жолугушту
Бул тууралуу Министрлер кабинетинин басма сөз кызматы билдирди
Акылбек Жапаров БУУнун Башкы катчысынын жардамчысы, Бириккен Улуттар Уюмунун Өнүктүрүү Программасынын (БУУӨП) администраторунун жардамчысы, БУУӨПтүн Европа жана КМШ өлкөлөрү боюнча Регионалдык бюросунун директору Ивана Живкович менен жолугушту. Бул тууралуу Министрлер кабинетинин басма сөз кызматы билдирди.
Акылбек Жапаров Кыргызстандын БУУӨП менен тыгыз өнөктөштүгүн жана уюмдун өлкөнүн социалдык-экономикалык өнүгүүсү боюнча реформаларды жана программаларды колдоорун белгиледи.
Улуттук артыкчылыктарды жана кызыкчылыктарды эске алуу менен 2030-жылга чейин БУУнун Туруктуу өнүктүрүү максаттарына жана 2050-жылга чейин жашыл өнүгүү платформасында көмүртектин нейтралитетине жетишүү милдеттемелери ырасталды.
Министрлер Кабинетинин Төрагасы ошондой эле Кыргыз Республикасынын Президентинин 2023-2027-жылдарга тоолуу аймактарды өнүктүрүүнүн беш жылдык аракеттери боюнча жана Кыргызстандын тышкы карызын жашыл демилгелерге алмаштыруу жөнүндө демилгелерин практикалык ишке ашыруу боюнча БУУӨП менен биргелешкен жана артыкчылыктуу иш-аракеттердин актуалдуулугун баса белгиледи.
Кыргызстанга айыл чарба, гидроэнергетика, кайра жаралуучу энергия, туризм, билим берүү, транспорт жана санариптештирүү тармактарында алдыңкы технологияларды тартууга кызыкдарлык билдирилди.
БУУӨП тоолуу аймактарды өнүктүрүү боюнча беш жылдык аракеттердин улуттук жол картасын ишке ашырууга жана климаттык көйгөйлөрдү чечүү үчүн Кыргызстандын Трасттык фондун түзүүгө активдүү катышууга чакырылды.
БУУӨП Европа жана КМШ боюнча Регионалдык бюросунун директору Ивана Живкович өз кезегинде Кыргызстан тоо-кен тармагынын дүйнөлүк күн тартибинде лидерлигин, бул эл аралык аренадагы позитивдүү мисалдардын бири экенин белгиледи.
Ал өкмөттүн жакырчылыкты жоюу, саламаттыкты сактоо жана билим берүү тармагын колдоо программаларын жогору баалады.
Фото WWW