Ташиев: "Кустуризация” процессинде бир тыйын да сол чөнтөккө кеткен жок

Улуттук коопсуздук боюнча мамлекеттик комитеттин төрагасы Камчыбек Ташиев коррупцияга каршы күрөштөн өлкө бюджетине канча каражат түшкөнүн билдирди.

Анын айтымында, буга чейин Каржы министрлиги тарабынан жарыяланган 20 миллиард сом накталай акча гана.

«Бирок биз дагы кыймылдуу жана кыймылсыз мүлктөрдү, малды жана башка кирешелерди төлөнбөгөн салык түрүндө эсепке ала турган болсок, анда түшкөн каражаттын көлөмү 100 миллиард сомдон ашат. Кээ бир объектилер боюнча соттук териштирүүлөр уланууда, анын көлөмү дагы көбөйөт», - деди Ташиев.

Ал ошондой эле «Кустуризациядан» түшкөн бардык каражаттар бюджетке түшүп, эч жакка «солго» кетпей турганын айтты.

«Сол чөнтөккө бир тыйын да түшкөн жок. УКМК да эч нерсени өздөштүргөн жок. Акыркы үч жылда кустуризация деп аталган каражаттын баары банктык эсепке которулуп, андан ары мамлекеттик казынага которулду», - деди атайын кызматтын жетекчиси.

Буга чейин Каржы министрлиги коррупцияга каршы күрөштөн 20 миллиард 445 миллион сом түшкөнүн билдирген. Алар укук коргоо жана көзөмөлдөө органдарынын депозиттик эсептеринде, ошондой эле мекеменин депозиттик эсебинде сакталаарын айткан.

Сүрөт: www