Бишкек шаардык соту Клооптун арызын караган жок

Бишкек шаардык соту Клооптун борбор калаанын Октябрь райондук сотунун «Клооп Медиа» коомдук фондун жоюу боюнча чечимине каршы даттануусун караган жок. Бул тууралуу басылманын юристи Нурбек Сыдыков билдирди.

Анын айтымында, шаардык сот арыз берүү мөөнөтү өтүп кеткендигине шилтеме кылган.

«Ошентсе да «Клооп Медиа» коомдук фондунун өкүлдөрү өз убагында арыз жазып, ал кайра кайтарылганын айтышты. Бул негизсиз жасалды деп эсептейбиз», - деди ал.

Нурбек Сыдыков белгилегендей, судьялар арыз Юстиция министрлигине туура эмес дарекке жөнөтүлгөнүн деп айтышкан.

«Башкача айтканда, бир санда ката кетирилген – Жаш Гвардияга 32дин ордуна 39 деп жазышкан. Жаш Гвардия көчөсүндө бир эле Юстиция министрлиги бар деп ойлойм. Арыз кайтарылгандан кийин Kloop дароо дагы бир апелляциялык арыз жазганына карабастан, шаардык сот өтүп кеткен мөөнөттү калыбына келтирүүдөн баш тартты. Мурда берилген өтүнүчтөр канааттандырылбай, кароосуз калды», - деди жактоочу.

«Клооп Медиа» шаардык соттун чечимине макул эмес жана ага даттанат.

Сүрөт: www