Депутат сотторду материалдык-техникалык жактан камсыздоо боюнча жаңы орган түзүүнү сунуштоодо

Депутат Марлен Маматалиев өлкөдө бардык сот органдарына уюштуруучулук, материалдык-техникалык жана башка колдоо көрсөтө турган жаңы мамлекеттик орган түзүүнү сунуштоодо. Тиешелүү мыйзам долбоору коомдук талкууга коюлду.

Парламентарийдин айтымында, мындай өзгөртүүлөр соттордун жана сот органдарынын ишин өркүндөтүү жана оптималдаштыруу, ошондой эле каржы булактарын жана материалдык ресурстарды сарамжалдуу пайдалануу үчүн зарыл.

"Каралган өзгөртүүлөр борбордук түрдө материалдык ресурстарды сатып алууну жүргүзүүгө мүмкүндүк берет", - деп түшүндүрдү Маматалиев документти колдоо билдирүүсүндө. - Мындай сатып алуунун мааниси, биринчиден, бир нече кардарлардын муктаждыктары үчүн бир эле учурда көлөмдүн чоңдугуна байланыштуу каражаттарды үнөмдөөгө байланыштуу болушу мүмкүн. Экинчиден, кардарларга административдик жүктү азайтууда (бирдей материалдык ресурстарды сатып алуу үчүн сатып алуулар процедураларын өз-өзүнчө жүргүзүүнүн кажети жок). "

Мыйзамдын демилгечиси эч кандай кошумча финансылык чыгымдардын кереги жок, бардыгы болгон каржылоонун эсебинен жүргүзүлөт деп ырастоодо.

Азыркы учурда, Жогорку Соттун алдындагы Сот департаменти Жогорку соттун жана жергиликтүү соттордун ишин уюштуруучулук, материалдык-техникалык жана башка жактан камсыз кылган ыйгарым укуктуу мамлекеттик орган болуп саналат.

Өз кезегинде юридика илимдеринин доктору Кайрат Осмоналиев Vesti.kg менен болгон маегинде бул идея жаңы эмес экендигин белгиледи.

"Буга чейин ири мамлекеттик сатып алуулар менен алектенген бирдиктүү органды түзүү аракеттери болгон", - деп түшүндүрдү ал. - Азыр кайсы гана мамлекеттик түзүм болбосун тендер өткөрөт, жетекчиликтин табити канчалык чоң болсо, салык төлөөчүлөрдүн жүгү ошончолук чоң болот. Бүгүнкү күндө бюджеттин 40 пайызга жакыны мамлекеттик сатып алууларга бөлүнгөн. Тендерлер боюнча учурдагы мыйзам өтө аялуу, сарпталган акчанын 30 пайызы чиновниктердин чөнтөгүнө кетет.

Кайрат Медербекович кошумчалагандай, Жогорку Соттогу кырдаал башка мамлекеттик органдардан анчалык деле айырмаланбайт.

- Ооба, балким бизге ушундай түзүм керек, бирок анда кынтыксыз кадыр-баркка ээ болгон адистер иштеши керек, - деп эсептейт ал. - Ал жерде эмгек акы көп болуш керек. Ошондо коррупцияны азайтып, бюджетти үнөмдөөгө болот.

Вероника Малышева
Сүрөт www