Мирлан Бакиров - кесиптештерине: Каза болгон депутат жөнүндө сөздү токтот, жанын жайына кой!

Бүгүнкү ЖКнын пленардык жыйынында депутаттардын ортосунда жаңы Конституциянын долбоорун кароо керекпи же жокпу деген талаш жаралды.

Мындай сунушту Бактыбек Турусбеков киргизди. Анын төрт кесиптеши каршы добуш беришти, калгандары колдошту.
Депутат Жанар Акаев Конституциянын долбооруна добуш берүү мыйзамсыз болгонун, ошондуктан бул документти бүгүн кароо туура эмес экендигин белгиледи.

"Биз бүгүн Конституциянын долбоорун карабашыбыз керек" деди Акаев. - Эреже бузулгандыктан, кийинки жумада дагы бир жолу добуш беришибиз керек. Көрсө, түрмөдө отурган депутат дагы добуш берген. Сиз эч нерсени түшүнбөгөндөй жүрөсүз, бирок Баш мыйзам туура эмес жазылгандыгын жана бизди узурпацияга алып бараарын түшүнүп турасыз.

Ошондой эле Дастан Бекешев анда депутаттардын мыйзамсыз добуш бергендиги боюнча далилдер бар экендигин эскерди.

-Биз дагы деле Конституциянын авторлорун таба албай жатабыз, - деди Бекешев спикер Талант Мамытовго кайрылып. - Сиз, спикер катары, добуш берүүгө катышышыңыз керек эле. Менде депутаттар беш же андан көп компьютерди кантип баскандыгы тууралуу видео бар.

Рыскелди Момбеков кесиптештерине кошулду.

-Жакшы, түрмөдө отурган депутат добуш берди, бирок өлгөн адам кантип добуш бермек? - деди Момбеков. - Мунун бардыгы үчүн биз мыйзамдын жана Кудайдын алдында жооп беребиз.

Төрага Талант Мамытов Конституция эки айдан бери каралып, эч кандай мыйзам бузуулар болгон жок деп жооп берди.

- Мен депутаттардын добуш берүүсү үчүн жооп бере албайм, - деп сүйлөдү спикер. - Баш мыйзамды комиссия эки айдан ашык карады. Мен дагы узурпация жөнүндө жооп бергим келет - ал бүгүнкү күнгө чейин болгон. Буга чейин парламент эч качан эч нерсе чечкен эмес жана ар дайым президентке баш ийген. Мурунку мамлекет башчыларынын бардыгы жоопкерчиликти алгандан коркушкан, эмне үчүн президентке мындай мүмкүнчүлүк бербесе болот?

Ал эми Мирлан Бакиров кесиптештери каза болгон депутат жөнүндө көп сүйлөп, анын ордуна парламентте добуш беришкенине нааразы болду.

"Силер каза болгон депутат жөнүндө дайыма эле айтып атасыңар" деди ал ачууланып. - Аны менен бирге добуш бердик деп айтасынар. Кырк күн да өткөн жок, жанын жайына кой. Комиссия конституцияны жактырды, ошондуктан жолун улайлы.

Фото www