Садыр Нургожоевич, сиз дагы ушундай азапты башыңыздан кечирдиңиз. Бабановдун туугандары Жапаровго кайрылуу жазышты
Мамлекет башчысына көрүнүктүү мамлекеттик ишмер Исхак Раззаков да жалаа жаап, каралоодон жапа чеккендиги эскертилди
Камакка алынган экс-премьер-министр Өмүрбек Бабановдун үй-бүлө мүчөлөрү жана туугандары президент Садыр Жапаровго кайрылуу жолдошту. Мамлекет башчысынан адилеттүү сот ишине көмөктөшүү жана саясатчыны камактан бошотуу өтүнүчү келтирилди.
«Урматтуу Садыр Нургожоевич!
Сиз Конституциянын жана мыйзамдуулуктун кепилдиги катары өз сөзүңүздү айтасыз деп ишенебиз!
Белгилүү болгондой, Өмүрбек Бабанов "Кумтөр" темасына байланыштуу негизсиз айып менен кармалган. Эгерде Өмүрбек Бабанов премьер-министр болуп турганда мыйзамды бузган болсо же мамлекетке жана элге каршы кандайдыр бир чечимдерди кабыл алган болсо, бул эчак эле ачыкка чыкмак. Тескерисинче, өзүңүздөр билгендей, премьер-министр болуп туруп, мамлекеттин пайдасына жана кызыкчылыгына чечимдерди кабыл алган, анын ичинде Данияр Үсөновдун өкмөтү Кумтөргө берген 6300 гектар жерди кайтарып берген. Кумтөрдөгү коррупцияга тиешеси бар экендиги далилденбегендиктен, сот процесси жабык өтүп, жалпыга маалымдоо каражаттарынын катышуусуз өтүп, акыйкатсыз чечим кабыл алынды. Биз муну анын саясий оппоненттерин каралоо жана көрө албастык деп эсептейбиз. Бул коомго ачык көрүнүп турат.
Урматтуу Садыр Нургожоевич!
Жалган жалаа жаап, жаманатты кылуудан өткөн жаман нерсе жок, бирок сиз өз элиңиз жана жериңиз үчүн гана жакшы иштерди жасадыңыз. Тилекке каршы, Кыргызстандын тарыхында дагы, сталиндик репрессиянын курмандыктары болгондон кийин дагы, Исхак Раззаков баш болгон адамдар жалган жалаага жана каралоолорго дуушар болушкан. Ушундай азапты сиз да баштан кечирдиңиз - сизге жакпаган нерсе үчүн айып тагышты жана алар сизге кээ бир адамдар жакпагандыгы үчүн гана жасашты. Демек, жеке өзүңүзгө эле эмес, үй-бүлөңүзгө, ата-энеңизге, балдарыңызга, бир туугандарыңызга канчалык кыйын экендигин түшүнүп турасыз. Сиздин ата-энеңиз, жубайыңыз, балдарыңыз, бир туугандарыңыз каралоодон жана түрмөдөн аябай кыйналды. Бүгүн биз - Өмүрбектин үй-бүлөсү, туугандары жана жакындары ушундай абалдабыз. Эми биз мамлекет башчысы катары эч кимди биздин коомдогу мыйзамсыз иштер жана адилетсиздик үчүн жалган жалаа жабууга жол бербейт деп ишенебиз. Ошондой эле бул өлкөнүн имиджи үчүн керек.
Кыргызстандагы демократиялык укуктук мамлекет катары сизде мыйзамдуулукту орнотуу милдети турат. Бул мезгил акыйкаттык жана мыйзамдуулук орногон мамлекеттин өнүгүшүндө бурулуш учур болот деп ишенебиз.
Кыргыз Республикасынын Конституциясынын кепили катары, Кумтөр маселеси боюнча Өмүрбек Бабановго коюлган айыпты мыйзамдуу жана акыйкат карап чыгууга жана камактан бошотууга жардам сурайбыз.
Урматтоо менен Өмүрбек Бабановдун үй-бүлөсү жана жакындары ”, - деп айтылат кайрылууда.
сүрөт www