Тарых музейи ИИМдей болбой, Бакиевдин сүрөтүн калтырды

Тарых музейинде 2010-жылдын 7-апрелиндеги ыңкылапка арналган экспонаттар жок деген жарандардын нааразычылыгына Маданият, маалымат, спорт жана жаштар саясаты министрлиги Vesti.kg сайтына жооп кайтарды. Ошол эле учурда музейде 2005-жылдагы революцияга арналган экспонаттар бар.

- Тарых музейи дагы толукталат, - деп түшүндүрүштү Маданият министрлигинен. - Бул акыркы жыйынтык эмес. Музей чексиз дүйнө. Директор бир күндө келип баарын асып сала албайт. Мунун баары убакыттын өтүшү менен толукталат.

Министрлик ошондой эле Кыргызстандын бардык президенттеринин: Аскар Акаевдин, Курманбек Бакиевдин, Роза Отунбаеванын, Алмазбек Атамбаевдин, Сооронбай Жээнбековдун жана Садыр Жапаровдун сүрөттөрү илинген стенд боюнча комментарий берди.

«Музейде Кыргызстандын президенттеринин сүрөттөрү түшүрүлгөн стенд илинип турат», - деп улантты Маданият министрлигинин басма сөз кызматы. - Бул Тарых музейи, тарых тарых бойдон калышы керек. Биз аны эч кандай жол менен жок кыла албайбыз, анткени бул биздин жол. Бул адамдардын баары бир кезде президент болгон. Алардын бирин алып салсак туура эмес болуп калат.

Эскерте кетсек, буга чейин ИИМдин БМЖКККнын имаратынын фойесинде бардык мурдагы жетекчилердин сүрөттөрү менен бирге качкын президент Курманбек Бакиевдин бир тууганы Жаныш Бакиевдин сүрөтү илинген. Кийинчерээк жарандардын нааразычылыгынан кийин портрет алынып салынып, Ички иштер министрлиги кыргыз элинен кечирим сураган.


сүрөт www