Караколдо мас абалындагы апасы көчөдө уктап калган 7 жаштагы наристе тоңуп кала жаздады (фото)

Караколдо мас эне менен болгон жагымсыз окуя болду. Каракол шаардык ички иштер башкармалыгынын мобилдик милиция бөлүмүнүн кызматкерлерине облус борборунун тургуну кайрылган. Ал көп кабаттуу үйдүн короосунда суукта көпкө чейин чоңдордун көзөмөлүсүз жүрүп, 6-7 жаштагы бала жатканын билдирген.

Милиция кызматкерлери дароо чара көрүп, суукта жалгыз белгисиз тарапка тентип бараткан баланы көп узабай табышкан. Ымыркайдын бети муздак болуп, сууктан сүйлөй да албай калды.

Шаардык милициянын ИИБнын инспекторлору балага тез эле ысык чай ичирип, андан соң суракка ала башташкан. 7 жаштагы баланын айтымында, апасы көптөн бери мас абалында болгон. Акыркы жолу чогуу басып баратышканда мас апа көчөдө уктап калып, ал басып кеткен. Кайра келгенде аны таппай койду.

Милиция кызматкерлери бардык керектүү документтерди чогултуп, баланы балдар үйүнө убактылуу жайгаштырышып, апасын өздөрү издөөгө киришкен. Көп өтпөй ал мас абалында шаардын көчөлөрүнүн биринен табылган. Баласынын кайда экенин сураганда түшүнүктүү жооп бере алган жок.

Каракол ШИИБнин ИИБнын инспекторлору тарабынан чогултулган материалдар тиешелүү чараларды көрүү үчүн шаардык мэриянын балдарды коргоо бөлүмүнө өткөрүлүп берилди.