Галош менен жүрүшөт. Депутат Надира Нарматовага Ак үйгө келгендердин сырткы келбети жакпайт

Депутат Надира Нарматова Жогорку Кеңештин кызматкерлери менен келген конокторго нааразы болду. Бул тууралуу ал «Ата Журт Кыргызстан» фракциясынын жыйынында билдирди.

«Бул жерде галош кийген адамдар  жүрүшөт. Кызматкерлер галстуксуз жүрүшөт, кээ бири футболкалар менен. Уят. Ар бир адам классикалык стилде жүрүш керек”, - дейт эл тандоосу.

Парламентарийге Ак үйдө азыркы жобого ылайык дресс-код бар экени, ага ылайык зыяратчылар да, кызматкерлер да кийимдердин классикалык түрүн карманышы керектиги айтылды.

Белгилүү болгондой, буга чейин Нарматова парламенттеги журналисттердин ишине тынчсызданган.

«Журналисттерди жана ЖМК өкүлдөрүн аккредитациялоодо алардын басып өткөн профессионалдык жолун, коомчулукка канчалык кызыктуу экенин эске алуу зарыл», - деп эсептейт депутат. «Депутаттарга ЖМКдан аккредитациядан баш тартууга мүмкүнчүлүк болушу керек».

Нарматова ошондой эле Жогорку Кеңештин жыйындарынан ар кайсы каналдардын, сайттардын журналисттери түз эфирге чыгып жатканына канааттанбайт.

«Аккредитациядан өткөн журналисттер бул жерге маалымат алуу үчүн келишет, бирок алар залга кирип, ар кайсы сайт аркылуу түз эфирге чыгышат. «Пирамида» телеканалы да ошентип көрсөтөт – түз эфирге чыгарат. Анан кичинекейлер келип түз эфирди алып барышат, маалыматты бурмалап беришет. Тартип болушу керек, - деп ачууланды ал.

Өз кезегинде депутат Бакыт Төрөбаев кесиптешине маалымат каражаттарынын иши парламентарийлердин ишмердүүлүгүн чагылдыруу экенин эскертти.

"Мен каршы эмесмин, бирок алардын бизге карата мамилеси туура болсо керек" деп жооп берди ал.

Эске салсак, жаңы чакырылыштын ишинин башында эле Нарматова депутаттарга жеңилдиктердин жоктугуна нааразы болгон.

«Парламенттин консультанты жана иштөөгө жетиштүү шарттары жок болсо кантип иштей алат? Унаа жок, көп депутаттардын үйү жок, айрымдары жалаң айлык менен күн көрүшөт. Алар кантип иштей алышат? Бир жардамчы менен эмне кылса болот? ал чындап таң калды.

Парламенттин жыйындарында маселе эки тилде талкууланып жатканы Нарматованы да кыжырдантты.

«Кыргызстанда кыргыз тили мамлекеттик тил болгондуктан, Жогорку Кеңеште тилибизди баалай билишибиз керек», - дейт эл өкүлү. - Арабызда 90 депутат, бир дагы орус жараны жок. Биз биринчи өзүбүздү өзүбүз сыйлашыбыз керек, анан аны башкалардан талап кылышыбыз керек. Зарылчылык болбосо, маселелерди мамлекеттик тилде талкуулоону сунуштайм”.

Сүрөт www