Руслан Казакбаев: Кыргызстан Орусия менен Украинанын ортосунда тынчтык орнотууга көмөктөшүүгө даяр

5-мартта Москвада Кыргызстан менен Орусиянын тышкы иштер министрлери Руслан Казакбаев менен Сергей Лавровдун жолугушуусу болду.

Эки өлкөнүн тышкы иштер министрликтеринин башчылары кыргыз-орус кызматташтыгынын бардык спектри боюнча сүйлөшүүлөрдү өткөрдү. Кыргыз Республикасы менен Россия Федерациясынын ортосундагы союздаштык мамилелердин жана стратегиялык өнөктөштүктүн деңгээлин, эки тарапты кызыктырган бардык чөйрөлөрдө эки тараптуу мамилелерди өнүктүрүүнү жогору баалашкан.

Руслан Казакбаев белгилегендей, Кыргыз Республикасы Россия Федерациясы менен эки тараптуу деңгээлде да, БУУ, КМШ, ЖККУ, ЖККУ ШКУ жана ЕАЭБ сыяктуу эл аралык жана аймактык уюмдардын алкагында да өз ара ишенимге жана түшүнүүгө негизделген кызматташтыкты мындан ары өнүктүрүүгө багытталган.

Тараптар Кыргызстандын жарандарынын Россия Федерациясында жүрүү жана иштөө маселелерин талкуулашты. Тактап айтканда, медициналык кароодон өтүү жана манжа изин алуу, миграциялык каттоодон өтүүдөгү кыйынчылыктар, ошондой эле биздин жарандарды Орусиянын аймагына кирүүгө тыюу салынган адамдардын тизмесинен (кара тизмеден) чыгаруу маселелери каралды.

Руслан Казакбаев россиялык тарапка кыргызстандыктардын кыргыз үлгүсүндөгү күбөлүктөрдү берүү менен Кыргыз Республикасынын аймагында медициналык кароодон өтүүсүн карап көрүүнү сунуштады.


Кыргыз Республикасынын Тышкы иштер министри республика Украинадагы кырдаалдын өнүгүшүнө тынчсыздануу  менен көз салып жатканын белгиледи. Ал Кыргызстан Орусия менен Украинанын ортосунда жаңжалды тынчтык жолу менен жөнгө салуу боюнча сүйлөшүү процессинин башталышын колдой турганын жана тараптардын биринчи кезекте ок атышууну токтотууга жана кризистен чыгууга көмөктөшүүчү өз ара алгылыктуу чечимдерине тез арада жетишүүсүнө кызыкдар экенин баса белгиледи.

Руслан Казакбаев ар кандай чыр-чатакты саясий жана дипломатиялык жол менен гана чечүү керектигин баса белгиледи. Ал кыргыз тарап бул багыттагы ар кандай ортомчулук аракеттерди колдой турганын жана зарыл болгон учурда тынчтыкты жана өз ара түшүнүшүүнү орнотууга көмөк көрсөтүүгө даяр экенин билдирди.

Ошону менен бирге ал Бишкектин ортомчулук миссияларындагы оң тажрыйбасын белгиледи: 1994-жылы Армения менен Азербайжандын ортосунда Тоолуу Карабакта ок атышууну токтотуу боюнча протоколго шаарда кол коюлган, дал ушул 1997-жылы Бишкекте Тажикстандын расмий бийликтери менен Бириккен тажик оппозициясы саясий маселелер боюнча протоколго кол коюшту.

Орус тарап Кыргызстандагы ички саясий кырдаалдын турукташуусун, анын ичинде конституциялык реформанын ийгиликтүү ишке ашырылышын, парламенттик шайлоонун өткөрүлүшүн жана аткаруу бийлигинин түзүлүшүн кубаттады. Сергей Лавров Кыргыз Республикасы Борбор Азия чөлкөмүндөгү позитивдүү күн тартибин алдыга жылдырат деп ишенерин билдирди, бул аймактын өлкөлөрүнө оң өзгөрүүлөрдү башынан өткөрүүгө мүмкүндүк берет.

Сүйлөшүүлөрдүн жыйынтыгында эки мамлекеттин тышкы иштер министрлери Кыргызстан менен Россиянын ортосундагы дипломатиялык мамилелердин түзүлгөндүгүнүн 30 жылдыгына карата биргелешкен билдирүүнү кабыл алышты, ошондой эле эки өлкөнүн тышкы иштер министрликтеринин ортосундагы кийинки үч жылдык мезгил кызматташтыктын программасын бекитишти. .

ТИМ басма сөз кызматы

Фото www