Дастан Жумабеков: Учурдагы инвестициялык мыйзамды өзгөртүүсүз калтырыш керек. Болбосо инвесторлорду чочутуп алабыз
Депутат доо арыздарды эл аралык соттордо талашса болот жана талашта жеңүү өлкөнүн кадыр-баркын көтөрөт деп эсептейт
Бүгүн, 19-апрелде Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитетинин жыйынында “Кыргыз Республикасындагы инвестициялар жөнүндө” жана “Кыргыз Республикасынын Арбитраждык соттору жөнүндө” мыйзамдарга өзгөртүүлөрдү киргизүү тууралуу” мыйзам долбоору каралды.
Депутат Дастан Жумабеков азыркы мыйзамды өзгөртүүсүз калтыруу керек деп эсептейт.
«Ири инвесторлор кайсы бир өлкөгө инвестиция салаардан мурун анын мыйзам базасын изилдеп чыгышат», - деп эскерет Жумабеков. - Эгерде биз инвесторду эл аралык арбитраждык сотто талашуу мүмкүнчүлүгүн мыйзамдан автоматтык түрдө алып таштасак, анда инвесторлорду чочутуп алабыз. Ошондуктан мен КР инвестициялары боюнча мыйзамга өзгөртүүлөрдү киргизүүгө каршымын.
Ал арада Юстиция министринин биринчи орун басары Зарема Аскарова бул эл аралык практика экенин белгиледи.
«Биз эл аралык тажрыйбаны изилдеп көрдүк жана инвестордун автоматтык түрдө эл аралык сотторго кайрылуу мүмкүнчүлүгүн алып салуу инвестициянын агымына эч кандай таасир этпей турганын аныктадык», — деди Аскарова. — Инвесторлор өз милдеттенмелерин аткарбай койгон учурлар бар. Ошондуктан мамлекет өз кызыкчылыгын коргошу керек. Өзгөртүүлөр эл аралык арбитраждык сотторго кайрылууга тыюу салбайт, бирок биринчиден, консультациялар, сүйлөшүүлөр жана жергиликтүү соттор аркылуу талаш-тартышты чечүүгө болот.
Өз кезегинде Дастан Жумабеков эл аралык соттордо талаш-тартыштарды жеңип чыгуу өлкөнүн кадыр-баркын гана көтөрөрүн айтты.
Анда эмне үчүн бул өзгөртүүлөр зарыл? – деп эл өкүлү ачууланды. — Эмне, Кыргызстан эл аралык арбитраждык сотторго ишенбейт? Эгерде инвестор дефолт кылса, анда талашып, ошол жерден ишти утуп алыңыз. Мындан өлкөнүн кадыр-баркы гана жогорулайт. Жергиликтүү соттор мамлекеттин пайдасына чечип, инвестор кийинчерээк эл аралык арбитражга кайрыла алат, эгер талашта жеңип чыкса, Кыргызстан эл аралык аренада жагымсыз абалга кептелет.
Ислам Жолдошов
сүрөт www