Энергетик суусундуктарга акциздин ставкасы 10 эсеге азайтылды
Акциз салыгынын ставкасы 2023-жылдын 1-январынан 31- декабрына чейин 1 литр үчүн 20 сомдун ордуна 2 сомду түзөт
Кыргыз Республикасынын Министрлер Кабинетинин 2023-жылдын 17-февралындагы токтому менен ТЭИ ТН 2202 товардык позициясында классификацияланган сергитүүчү (энергетикалык) алкоголсуз суусундуктарга акциз салыгынын ставкасы он эсеге азайтылды. Бул тууралуу Мамлекеттик салык кызматынын басма сөз кызматы билдирди.
Алсак, акциз салыгынын ставкасы 2023-жылдын 1-январынан 31- декабрына чейин 1 литр үчүн 20 сомдун ордуна 2 сомду түзөт. 2024-жылдын 1-январынан баштап бул сумма 30 сомдун ордуна 3 сом болот.
Мындан тышкары, 2024-жылдын 1-январынан тартып сергитүүчү (энергетикалык) алкоголсуз суусундуктарды милдеттүү түрдө маркалоо киргизилет.
Белгилей кетсек, алкоголсуз суусундуктарды маркалоо – бул товардын келип чыгышынын мыйзамдуулугун тастыктоочу натыйжалуу механизми жана калкты контрафакттык продукциядан коргоого багытталган.
фото www