Бишкекте тик учактын кыйрашынан каза болгон аскердин сөөгү жерге берилди
17-январда катталган каргаша 30 жаштагы жаш учкучтун өмүрүн алып кетти
Бишкектеги Достук кичирайонуна жакын “Фрунзе-1” авиабазасында тик учак кырсыгынан каза болгон экипаждын командири, капитан Жайыл Самудиновдун сөөгү жерге берилди.
30 жаштагы учкуч менен коштошуу зыйнаты бүгүн Ак-Өргө конушунда өттү. Маркум менен коштошууга Коргоо министрлигинин өкүлдөрү катышты.
Жайыл Самудинов 1994-жылы Бишкекте туулуп, Россиянын Сызрань шаарындагы жогорку аскердик авиациялык академияны бүтүргөн. Соңку кезде Коргоо министрлигинин Башкы штабында кызмат өтөп жүргөн.
Эске салсак, кырсык 17-январда катталган. Бортто жалпы 11 киши болгон, калган 10 адам учурда Бишкектеги ооруканаларда дарыланууда.
Кырсык боюнча ыкчам-тергөө амалдары жүргүзүлүүдө. Ага байланыштуу Куралдуу Күчтөрүнүн Абадан кол салуудан коргоо күчтөрүнүн айрым кызмат адамдары убактылуу иштен бошотулду. Мындай чара тергөө иштерин объективдүү жүргүзүү максатында кабыл алынган.
Фото www