Таласта модернизацияланган аэропорт ачылды (фото)
Талас аэропорту 1979-жылы курулуп, бирок СССР тарагандан кийин иштебей калган
Бүгүн Таласта жергиликтүү аэропорттун модернизациядан кийинки салтанаттуу ачылыш аземи болду. Ага президент Садыр Жапаров катышты.
Президент 1979-жылы учактарды жана тик учактарды иштетүү үчүн курулган Талас аэропорту СССР тарагандан кийин иштебей калганын, кийинчерээк толук реконструкциялоо зарылдыгынан жана аэродромдун эскилиги жеткендиктен учуу тилкеси толугу менен жабылганын белгиледи.
Саатына 100 адамды кабыл ала турган аэропорттун жаңы терминалы жана модернизацияланган учуу тилкеси жаңыланган аэропорт комплексинин негизги элементтери болуп калды.
Мамлекет башчы ошондой эле Кыргызстандагы аэропортторду жандандыруу долбоору бир гана Талас менен чектелбестигин кошумчалады. Ошентип, учурда «Каракол» жана «Тамчы» эл аралык аэропортторунда аэровокзал комплекстерин жигердүү куруу иштери жүрүп жатат. Нарын облустук аэропортунда аэродром куруу иштери толугу менен аяктап, учуп-конуу тилкеси оңдолууда. Казарман, Кербен жана Баткен аэропортторунун учуп-конуу тилкелерин реконструкциялоо иштери аяктап жатат. Баткен эл аралык аэропорту ушул күндө ар кайсы жерден каттамдарды кабыл алууда. Кошумчалай кетсек, «Манас» эл аралык аэропорту биринчи жолу ички аба транспортунун керектөөлөрүн канааттандыруу үчүн Q-400 учагын сатып алды.
Сүрөт президенттин басма сөз кызматынан