Ташиев: "Билбей калат деп пара албагыла. Баарыңар камаласыңар!" 

Бир ишти аткарып жатканда өзүңөрдүн жеке кызыкчылыгыңарды көздөп, мамлекеттин кызыкчылыгын жылдырып койсоңор баары билинип калат. Бул тууралуу кече, 28-ноябрда УКМКнын төрагасы Камчыбек Ташиев Бишкекте УКМКнын Биринчи май жана Свердлов райондук бөлүмдөрүнүн жаңы имаратынын ачылышында айтты.

Анын айтымында, өзүнүн кызыкчылыгын ойлоп, пара алгандар камалат.

"Ким өзүнүн кызыкчылыгын ойлоп иш кылса, ал бүгүн билинбесе да күндөрдүн бир күнүндө билинет. Таза иштегиле! Таза иштебегендерди билемин. Баарын чукуп чыгамын айтып коеюн. Кимдир бирөөңөр мен берген тапшырмалардын негизинде пара алам десеңер, же алып койгон болсоңор анда жоопко тартыласыңар! Ачык айтайын урматтуу кызматкерлер, эгерде мыйзам бузсаңар сөзсүз жоопко тартыласыңар. Камаласыңар. Ар дайым силерди жоопко тартканда менин жүрөгүм ооруйт. Бирок, ага карабастан жоопко тартышым керек. Бирөөңдү, экөөңдү аяп койсом анда бизде тартип сакталбай калат. Башаламан болуп кетет. Бүгүн жасадым билбей калды дебегиле айтып коеюн. Жасаган кылмышыңар бир ай, алты ай, бир жылдын ичинде билинет", - деп кайрылды Ташиев УКМК кызматкерлерине.