КЫШ ДЕН СООЛУКТУ КАЛЫБЫНА КЕЛТИРГЕН МЕЗГИЛГЕ АЙЛАНГАНДА: ТҮРКИЯДА КЫШКЫ КУРОРТТОР СЕЗОНУ

Саякат тенденциялары өзгөрүп жаткан шартта, туристтер жаңы багыттарды ачуу менен катар терең мааниге ээ тажрыйбаларды издөөгө көбүрөөк көңүл бурууда. Айрыкча саламаттык туризми жеке өзгөрүүгө дем берген, байыркы айыктыруу салттарына, жаратылышка негизделген ырым-жырымдарга жана терини жаңыланууга багытталган эс алуу форматтары аркылуу кайрадан аныкталууда. Matador Network Travel Awards сыйлыгынын алкагында 2025-жылдын “Эң мыкты саламаттык туризми багыты” деп табылган Түркия бул тармактагы мүмкүнчүлүктөрүнүн ар түрдүүлүгү менен өзгөчөлөнөт.

Жалгыз, үй-бүлө менен же муундар аралык саякат кылгандар үчүн Түркия кыш мезгилинде саламаттык туризми багытындагы жогорку деңгээлдеги эс алууну сунуштайт. Кышты ден соолукка арналган өзгөчө мезгилге айланта турган мүмкүнчүлүктөргө токтололу.

Түркиянын кышкы классикасы: табигый термал булактардагы саламаттык туризми

Айыктыруу салты байыркы доорлорго барып такалган Түркия дүйнөдөгү эң эски саламаттык туризми багыттарынын бири болуп саналат. Илгери Иераполис жана Пергамон сыяктуу дарылоо борборлору жайгашкан Анатолия миңдеген жылдар бою термал суулардын айыктыруучу күчү менен калыптанган. Бүгүнкү күндө Түркия дүйнөдө термал ресурстар боюнча жетинчи, Европада биринчи орунда турат. Өлкө боюнча 1 500дөн ашуун термал булак бар. Афьонкарахисар, Бурса жана Денизлидеги Памуккале сыяктуу алдыңкы багыттар Европанын тарыхый термал шаарларынын маршрутуна кирип, Түркиянын термал мурасын даңазалап келет.

Афьонкарахисар минералдарга бай суулары жана дарылык ылай ванналары менен белгилүү. Алар салттуу түрдө жашартуучу жана ден соолукту чыңдоочу касиеттери үчүн бааланат. Бурса шаарында термал маданият күнүмдүк жашоого жана заманбап медицинанын, анын ичинде физиотерапиянын бөлүгү катары интеграцияланган. ЮНЕСКОнун тизмесине кирген Памуккале жана байыркы Иераполис шаары минералдуу террасалары жана дарылык бассейндери менен кылымдар бою зыяратчыларды өзүнө тартып келет. Алардын ичинде Клеопатра сууга түшкөн деп айтылган атактуу байыркы бассейн да бар. Мындан тышкары, Түркия Балыкесирден Яловага, Айдындан Болуга чейин жыл бою табигый туруктуу температурага ээ көптөгөн термал шаарларды сунуштайт.

SPA жана хамамдар: саламаттык туризминде жаңылануу

Кылымдарды карыткан хамам маданияты менен белгилүү болгон Түркияда саламаттык туризми багытындагы эс алуу салттуу түрк мончосуна барбай толук болбойт. Өлкөнүн бардык аймактарындагы тарыхый хамамдарда буу ванналары, денени тазалоочу сүртүнүү ырымдары жана жумшак самын массаждары аркылуу денени жана жан дүйнөнү жаңылоого шарт түзүлөт.

Түрк хамамы — бул өткөндүн калдыгы эмес, бүгүнкү күндө да актуалдуулугун жоготпогон жандуу маданий практика. Дал ушул нукуралуулугу жана тарыхый тереңдиги Стамбулдагы Zeyrek Çinili Hamam жайын дүйнөлүк деңгээлге чыгарып, аны Time журналынын World’s Greatest Places 2024 тизмесине, ошондой эле National Geographic тарабынан Best of the World Wellness Experiences 2026 (саламаттык туризми категориясында) тизмесине киргизген.

Заманбап тажрыйбаны каалагандар үчүн Түркиянын ири шаарларында жана жээктеги курортторунда жайгашкан SPA жана саламаттык туризми борборлору иштейт. Бул жайларда заманбап хамамдар сауна жана джакузилер менен айкалышып, массаждан тартып деңиз суусу менен дарылоого жана жеке машыгуу программаларына чейин кеңири кызматтар көрсөтүлөт.

Жаратылышка негизделген саламаттык туризми

Саламаттык туризминин алкагында саякатчылар күнүмдүк жашоодон алыстап, жаратылыш менен гармонияда эс алууну көбүрөөк тандап жатышат. Бодрум, Фетхие жана Анталья сыяктуу жээктеги багыттарда жайгашкан йога-ретриттер, органикалык чарбалар жана детокс-борборлор деңиз жээгинде калыбына келтирүүчү эс алуу үчүн идеалдуу шарттарды түзөт. Бул программалар көбүнчө йога, пилатес, дем алуу көнүгүүлөрү жана туура тамактанууга багытталып, дене менен акыл-эсти тең салмакка келтирүүгө жардам берет.

Мындан тышкары, Түркиянын Cittaslow шаарлары жана “Best Tourism Villages” деп таанылган айылдары жаратылышка жана жергиликтүү жашоого негизделген тынч саламаттык туризми альтернативаларын сунуштайт. National Geographic тарабынан 2026-жылы саякаттоо үчүн эң мыкты аймактардын бири деп табылган Кара деңиз аймагы болсо бийик тоолору жана жыгач үйлөрү менен өзгөчөлөнөт. Бул аймактарда жөө жүрүштөр жана велосипед тебүү саламаттык туризминин маанилүү бөлүгү болуп саналат.