Бишкекте баңгизат менен күрөшүүчүлөр “закладчиктен” 1 миң дозадан ашык психотроптук заттарды алышты - видео
24 жаштагы баңгизат сатуучу борбордун Биринчи Май районун тээлеп турган
Бишкекте баңги затын мыйзамсыз жүгүртүүгө каршы күрөшүү кызматынын кызматкерлери синтетикалык баңги затын сатууга шектеп Ысык-Ата районунун 24 жаштагы тургунун кармашты.
Ички иштер министрлигинин басма сөз кызматы билдиргендей, Б.А. баңгизаттарды таңгактап Бишкектин Биринчи Май районундагы аймакта кыстармаларды катып иштеген. Ал күн сайын борборго келип, шаардын борборундагы чоң кыстармаларды көзөмөлдөп турган.
Тинтүү учурунда жигиттин жанынан 20дан ашык баңги зат салынган баштык табылган. Анын унаасынан дагы 29 баштык табылган. Экспертиза көрсөткөндөй, бул баштыктарда Альфа-ПВП психотроптук заты бар экени аныкталган. Кошумчалай кетсек, борбор калаанын четинде синтетикалык баңгизаттардын ири сактагычы – ар бири 1 граммдан 30 даана баңги заттар табылган. Экспертиза алардын курамында психотроптук дары мефедрон бар экенин көрсөткөн. Жалпысынан 1 миңден ашык доза алынган.
Фото: ИИМ басма сөз кызматы