Садыр Жапаров: Эркиндик менен демократияга жамынып алып упай топтогон саясатчыларыбыз бар

Президент Садыр Жапаров Жогорку Кеңеште сүйлөгөн сөзүндө 7-чакырылыштагы депутаттардын ишинин жыйынтыгын чыгарды.

Ал дагы бир жолу Кыргызстан демократиялык республика бойдон кала берээрин, ар ким өз оюн эркин билдирүүгө укуктуу экенин баса белгиледи. Бирок мамлекет башчы Кыргызстанда эркиндикке, демократиянын принциптерине жамынып саясий упай топтогон саясатчылар бар экенин кошумчалады.

«Конституциябыздын 1-беренесинде Кыргызстан демократиялык өлкө деп бекеринен айтылган эмес, анткени элибиздин менталитетинде, канында демократиянын элементтери бар. Биздин өлкөдө ар бир жаран эркин ой жүгүртүүгө, өз оюн ачык айтууга укуктуу. Бирок, бизде эркиндикке, демократиянын принциптерине жамынып алып, ошол киреше булактарын ар кандай негизсиз сынга алып, саясий упай топтоону көздөгөн саясатчыларыбыз бар. Демократияда, албетте, атаандаштык көз караштар болушу керек», - деди Жапаров.

Анын үстүнө президент быйыл 1-августтан тарта мамлекеттик кызматкерлердин айлыгын көтөрүүнү убада кылды.

«Мен жогоруда айткандай, бизде башка тармактарда иштегендердин эмгек акысын жогорулатуу боюнча жакшы ниетибиз жана конкреттүү пландарыбыз бар экенин баса белгилегим келет. Кудай буюрса ушул жылдын 1-августунан тарта ишке ашырабыз. Кудай буюрса, 1-августтан баштап мугалимдердин айлыгын бардык тармактарда көтөрөбүз», - деди Жапаров.

Мындан тышкары, президент эл өкүлдөрүнө талап дагы катуу болоорун баса белгиледи.

«Сиз жетектеген аймактарга талаптар дагы катаал болорун эскертким келет. Анткени бүгүн жаңы келгендердин акырындап көнүп, ишке аралашууга убактысы да, мүмкүнчүлүгү да жок. Бул бүгүнкү күндүн чындыгы”, - деп түшүндүрдү мамлекет башчысы.

Садыр Жапаров депутаттарга жакшы эс алып, шайлоочулары менен жемиштүү жолугушууларды каалады.

Элдос Казыбеков
Сүрөт www