Викрам Рузахунов кыйноолор боюнча ишти тергөөгө катышуу үчүн Казакстанга учуп кеткен

Кыргызстандык джазмен Викрам Рузахунов Алматы облусунун Коррупцияга каршы күрөшүү башкармалыгы тарабынан кыйноолор боюнча козголгон кылмыш ишинин алкагында жүргүзүлүп жаткан тергөө амалдарына катышуу үчүн Алматыга барган. Бул тууралуу Orda.kz билдирди.

Сапарда аны бишкектик юрист коштоп жүрөт, ал дагы эки алматылык кесиптеши менен бирге Казакстанда болгон учурда мыйзамдын жана кардардын укуктарынын сакталышын көзөмөлдөйт.

Журналисттер менен болгон маегинде музыкант кыйноолордун кесепеттерин дагы деле сезип жатканын белгиледи.

"Мен тез-тез башым ооруйт, ошондой эле кабыргалардын сынган жери ооруйт, дем кысылып турат", - деди ал. "Баары майыптык менен бүтпөгөнү жакшы, мындан жаман болмок."

Ал кыйноочуларды кечирбейт. Анын үстүнө кылмыш иши боюнча өкүм чыккандан кийин Рузахунов Алматы облусунун ички иштер башкармалыгына моралдык жана материалдык зыяндын ордун толтуруу боюнча жарандык доо арыз менен кайрылмакчы.

Музыкант физикалык жана моралдык зыяндан тышкары материалдык зыян тартканын белгиледи.

«7-январь күнү колго түшүрүү маалында алар менден 3 миң доллар, 65 миң теңге, уюлдук телефон жана башка буюмдарды алып, андан кийин кайтарып беришкен эмес. Мага уурдалган баалуулуктардын баасы да, тарткан психологиялык жана физикалык азаптар үчүн да компенсация берилсин. Азырынча келтирилген зыяндын суммасын эсептей элекмин, бирок укук коргоо кызматкерлерин жарандык жол менен сотко берем – бул анык!». — деп жыйынтыктады ал.

Эске салсак, 2022-жылдын январында Казакстанда суюлтулган газдын кымбатташына байланыштуу массалык нааразылык акциялары өткөн.
Бир нече күндөн кийин социалдык тармактарда жана маалымат каражаттарында бир адам Казакстанга Алматыдагы митингге катышуу үчүн келгенин айткан видео тарады. Бул үчүн ага 200 доллар төлөп берүүнү убадалашкан имиш. Ал кишиде бишкектик джазмен Викрам Рузахунов таанылды. Кийинчерээк Кыргызстандагы активисттердин жана журналисттердин талабы менен ал бошотулуп, мекенине жеткирилген.
Викрам Рузахуновдун жана дагы бир кыргызстандык Чолпонбек Сыдыковдун кармалышы жана катаал мамилеси боюнча кылмыш иши козголуп, тергөө амалдары жүрүп жатат.

Сүрөт www