Медиа юрист: Депутат Нарматова сабатсыздыгын көрсөттү. Мыйзамды такыр түшүнбөйт

Бир күн мурун Жогорку Кеңештин “Ата Журт Кыргызстан” фракциясынын депутаты Надира Нарматова эл депутаттарынын ишин чагылдырууда маалыматты бурмалап жатат деген журналисттерге нааразы болгон.

Мындан тышкары, Нарматова Жогорку Кеңештин жыйынынан түз эфирге чыгуу мүмкүнчүлүгүн чектеп, бул укукту мамлекеттик «Пирамида» телеканалына гана калтырууну сунуштады.

«Парламентте аккредитациядан өткөн журналисттер келип, маалымат алып, түз эфирге чыгышат. Отурумдун көрсөтүүсү “Пирамида” телеканалында – алар гана көрсөтүшү керек. Журналисттерден түз эфирге чыгуу мүмкүнчүлүгүн токтотуу керек. Анан майда кабарчылар келип, маалыматты бурмалап эфирге чыгарышат. Тартип болуш керек», - деди Нарматова.

Өз кезегинде парламентарий Бакыт Төрөбаев депутаттардын ишмердүүлүгүн чагылдыруу жана сындоо журналисттердин түздөн-түз иши экенин белгиледи.

Нарматованын сунушу жарандардын кыжырын келтирди.

Ал ортодо медиа юрист Адилет Талантбек уулу Vesti.kg сайтына Нарматованын сунушу Конституцияга каршы келерин билдирди. Анын айтымында, элдин кулуну сабатсыздыгын көрсөткөн.

«Нарматова өңдүү адамдар парламенттин ишин лоялдуу ЖМКларга гана чагылдыруу мүмкүнчүлүгүн берип, жабык иш жүргүзүүгө аракет кылып жатышат», - деп баса белгиледи юрист. - Бул маалыматка жетүүнүн жабылышына алып келет. Анын үстүнө бул коомчулук үчүн маанилүү маалымат, тиешелүүлүгүнө жараша бул элге каршы сунуш. Жалпыга маалымдоо каражаттары жөнүндө мыйзамда ар бир адам маалымат алууга укуктуу деп жазылган. Нарматова өзүн жаманатты кылып, сабатсыздыгын, мыйзамдарды түшүнбөгөндүгүн көрсөттү.

Vesti.kg сайтынын редакциясы Нарматованын өзү менен да байланышкан, бирок ал комментарий берүүдөн карманган.

Элдос Казыбеков
Сүрөт www