Саламаттыкты сактоо министрлиги: Өлкөдө кызамык боюнча кырдаал оор бойдон калууда
“Оорунун жайылышын үзгүлтүккө учуратуу үчүн эмдөө менен камтуу 95% дан жогору болушу керек”
Ошондой эле, министрлик кайсы аймакта эң көп учур катталганын маалымдады.
2023-жылдын башынан бери өлкө боюнча кызамык менен ооруган 3618 учур аныкталганын Республикалык иммунопрофилактика борборунун маалыматына таянуу менен Саламаттыкты сактоо министрлигинин басма сөз кызматы билдирди.
Аймактар боюнча: Бишкек шаары – 1076 учур, Ош шаары – 333 учур, Ош облусу – 695 учур, Баткен облусу – 96 учур, Чүй облусу – 562 учур, Жалал-Абад облусу – 650 учур, Талас облусу – 95 учур, Ысык-Көл облусу – 72 учур, Нарын облусунда – 39 учур. ⠀
- Жашы боюнча бөлүштүргөндө 88% же 3195 учур 10 жашка чейинки балдар арасында катталган. Оорулуулардын эмдөө абалы боюнча 87% же 3140 бейтап ар кандай себептер менен эмдөө алган эмес, - деп айтылат министрликтин маалыматында.
Мекемеден белгилешкендей, кызамык вирусунун активдүү циркуляциясы Бишкек, Жалал-Абад жана Чүй облустарында байкалууда, бул жерде вирустун жугушу уюшкан топтордогу эмделбеген балдар арасында кездешүүдө.
Уюшкан жамааттарда кызамыктын очогун жок кылуу үчүн кызамыкка жана кызылчага каршы вакцина менен кошумча эмдөө жүргүзүлүүдө, кызамыкка жана кызылчага каршы “толуктоочу” эмдөө кызылча-паротит-кызамыкка каршы вакцина менен кызамыкка каршы пландуу эмдөөнүн алкагында жүргүзүлүүдө, медицина кызматкерлери активдүү очокторго күчөтүлгөн тартипте көз салууда. Жалпысынан кызамык боюнча кырдаал курч бойдон калууда.
9 айдан 7 жашка чейинки курактагы балдарды кызылча жана кызамыкка каршы кошумча эмдөө кампаниясы вирус эң активдүү жайылган аймактарда: Бишкек, Ош шаарларында, Ош, жана Чүй облустарында улантылууда. Жалал-Абад облусунда кызамык оорусу күчөгөнүнө байланыштуу уюшкан топтордогу балдарды кошумча эмдөө иштери башталды. Мындан тышкары, бардык курактагы байланыштагы адамдар 72 сааттын ичинде ыкчам түрдө эмдөөдөн өтүшөт.
- Оорунун жайылышын үзгүлтүккө учуратуу үчүн эмдөө менен камтуу 95% дан жогору болушу керек. Кызамыкка жана кызылчага каршы кошумча эмдөө кампаниясынын алкагында бүгүнкү күндө 462 692 бала вакцина алды, бул 77%ды түзөт, - деп жыйынтыкташты министрликтен.
Фото www