Автобус жана троллейбустарда контролерлор мыйзам бузууларды текшерет
Эки күндүн ичинде 100дөн ашык тартип бузуучулар аныкталды
Бишкекте "Тулпар" көзөмөл кызматы муниципалдык коомдук транспорттордогу жол кире төлөө процессине текшерүү жүргүзөт.
Мэриянын басма сөз кызматы маалымдагандай, эки күндүн ичинде 100дөн ашык эреже бузгандар аныкталган. Тактап айтканда, айдоочулар талонду беришкен эмес же жүргүнчүлөр мурда колдонгон талонду жаңы талон катары өткөрүп беришкен.
Мэрия жол кире акысы ар бир сапар үчүн талап кылынарын жана транспортко киргенде төлөнүшү керектигин эскертет. Валидатордо төлөмдү ырастоо контролерлор менен түшүнбөстүктөрдү болтурбоого жардам берет.
«30-январдан бери жүргүзүлүп жаткан күчөтүлгөн текшерүүлөр каттамдарда жол кире акысы жогорулаганын көрсөттү. Ошентип, бул күнү накталай эмес, ошондой эле накталай төлөмдөрдүн бардык түрлөрү менен жол кирелердин саны 390 миң транзакциядан ашты. Ушундай текшерүүлөр күн сайын жүргүзүлүп, шаардын муниципалдык транспорт тармагын камтыйт», - деп айтылат мэриянын билдирүүсүндө.
Контролерлор укук коргоо органдарынын өкүлдөрү менен активдүү кызматташып, коомдук тартипти жана жүргүнчүлөрдүн коопсуздугун, ошондой эле транспортто эрежелердин жана мыйзамдардын сакталышын камсыз кылууда.
Белгилей кетсек, мэрия азыркы учурда контролерлорду жумушка алууда. Алар күнүнө 1500 сомдон маяна жана ар бир сатылган «Тулпар» картасы үчүн 10 сом төлөп беришин убада кылышууда.
Эске сала кетсек, 31-январдан тарта Бишкекте коомдук транспортто жол кире акысы кымбаттады: автобустарда жана троллейбустарда жүрүү баасы накталай эмес 17 сом, накталай болсо 20 сом. Накталай акча төлөөдө айдоочу талон бериши керек, ал сапардын аягына чейин сакталышы керек.
Фото WWW