Кым-куутка түшмөй жок. Эртең Бишкекте ыкчам кабарлоо сиреналарынын ач айкырыгы угулат
Борбор калаада өзгөчө кырдаалдар учурунда жарандарды сиреналар менен кабарлоо системасын текшеришет. ӨКМ жарандарды түшүнүк менен кабыл алууну өтүнөт
2017-жылы КРнын ӨКМнин демилгеси менен 5-октябрды Кыргыз Республикасында кырсыктардын тобокелин азайтуу күнү деп жарыялоо боюнча өкмөттүн буйругу чыккан. Өзгөчө кырдаалдар министри Нурболот Мирзахмедовдун буйругу менен 2019-жылдын 5-сентябрынан 5-октябрына чейин Кыргызстандык бардык аймактарында «Кырсыктардын тобокелин азайтуу күнүнүн» алкагында айлык өткөрүлөт.
Бул иш-чаралардын алкагында жана шаардын мэри тарабынан бекитилген Бишкек шаарынын 2019-жылкы Жарандык коргонууга даярдоо планына ылайык, 2019-жылдын 2-октябрында Бишкек шаарынын жарандык коргоо кызматы менен биргеликте «Башкаруу органдарынын жана Жарандык коргоо күчтөрүнүн жер титирөө маалында аткарчу иш-аракеттери» темасында командалык-штабдык окуулар өтөт.
Окуулардын жүрүшүндө 2019-жылдын 2-октябрында 11:00дө Бишкек шаарынын аймагында орнотулган калкты сиреналар менен кабарлоо системасынын абалы текшерилет. Буга байланыштуу, жарандарды аталган иш-чараны түшүнүк менен кабыл алып, сиренанын үнүн уккан учурда эч кандай аракет кабыл албоону суранабыз.
Бул иш-чаралардын максаты калкты өзгөчө кырдаалдар маалында өзүн-өзү алып жүрүүнү үйрөтүү болуп саналат.
КРнын ӨКМнин басма сөз кызматы
Фото www