Баткенде блогер Батмакан Жолболдуева кармалды - видео
Ал интернетке жүктөлгөн материалды өчүрүү үчүн акча талап кылган
Кыргыз Республикасынын Кылмыш-жаза кодексинин 208-беренесинин 1-бөлүгү (Опузалап талап кылуу) боюнча козголгон кылмыш ишинин алкагында Ж.Б.Т.(Батмакан Жолболдуева) аттуу блогер кармалды, деп билдирди УКМКнын басма сөз кызматы.
Башкармалыктын маалыматы боюнча, 2024-жылдын январь айында интернет тармагында блогер аталган Ж.Б.Т., Жалал-Абад шаарындагы коомдук тамактануу жайларынын бирине барып, ал жер санитардык-эпидемиологиялык талаптарга жооп бербегендиги үчүн видеого тарткандыгы аныкталган. Андан кийин материалдык пайда алуу максатында, Ооруларды алдын алуу жана мамлекеттик санитардык-эпидемиологиялык көзөмөл борборунун, Жалал-Абад шаарындагы коомдук тамактануу жайларын тейлеген кызматкери тууралуу маалымат чогултуп, мурда тартылган видео тасманы өзүнүн “Facebook” социалдык баракчасына жарыялап, талапка жооп бербеген аталган коомдук жайды мамлекеттик санитардык-эпидемиологиялык көзөмөлдүн кызматкери “калкалап” жатат деген таризде шилтеме калтырган.
«Андан соң Ж.Б.Т. интернетке жүктөлгөн материалды алып өчүрүп салуу үчүн, Ооруларды алдын алуу жана мамлекеттик санитардык-эпидемиологиялык кѳзѳмѳлдѳѳ департаментинин кызматкеринен 25 миң сом өлчөмүндө акча каражатын талап кылган»,-деп билдиришти башкармалыктан.
6-февралда Батмакан Жолболдуева опузалап акча алып жаткан жеринен кармалган. Ал УКМКнын убактылуу кармоочу жайына камалды.
Эске салсак, 2022-жылы аталган блогер АКИpress агенттигинин журналисти каза болгондон кийин кармалган. 2022-жылдын 25-мартында интернетте ар-намысты жана кадыр-баркты түшүргөн маалыматтарды таратканы үчүн журналист блоггердин үстүнөн милицияга арыз жазган. Ошол эле күнү журналисттин ден соолугу начарлап, социалдык жана психологиялык кысымга туруштук бере албай каза болгон.
Фото WWW