Бир айдын ичинде Бишкекте чөнтөк уурулук боюнча адистешкен 5 топ кармалды
Милиция жабырлануучуларды издеп жатат
22-январдан 22-февралга чейин Бишкек шаарында «Чөнтөк уурулукка жол жок!» аталышындагы ыкчам-профилактикалык иш-чаралар өткөрүлдү.
Борбор калаанын ички иштер башкармалыгынан билдиришкендей, иш-чараларга 400дөн ашык милиция кызматкерлери тартылган. Жыйынтыгында чөнтөк уурулук боюнча 40тан ашуун кылмыштын бети ачылып, кылмышка шектүүлөр, анын ичинде уюшкан кылмыштуу топтун мүчөлөрү кармалган. Мындан тышкары, чөнтөк уурулук боюнча адистешкен 5 кылмыштуу топ жок кылынды.
Кылмышка шектүүлөрдөн уурдалган ар кандай маркадагы уюлдук телефондор, кол жүгү жана накталай акчалар табылып, алынган.
Милиция жабыркаган жарандарды 0(554) 11-03-14, 0(706) 102-102, 0(707) 75-75-51, 0(703) 35-15-65 же 102телефондоруна кабарлоону суранат.
Сүрөттү Борбордук ички иштер башкармалыгынын басма сөз кызматы таратты