Кантта тергөөчү сабалды. Кылмышка шектүүлөр кармалды
Үчөө тең убактылуу кармоочу жайга киргизилди
Чүй облусундагы Кантта милиция кызматкерин сабаган жигиттер кармалды. Бул тууралуу облустук ички иштер башкармалыгынан билдиришти.
Мурдараак маалымдалгандай, 14-апрель күнү саат 04:00 чамасында Маркет-24 дүкөнүнүн жанынан белгисиз адамдар 33 жаштагы К.Р.ны сабап салышкан. Жабырлануучу оң жагындагы ээк бөлүгүндө ылдыйкы жаактын ачык сыныгы, сол тарабындагы жабык сыныгы диагнозу менен Улуттук госпиталдын жаак-бет хирургиясы бөлүмүнө жаткырылган.
Бул фактынын негизинде КРнын Кылмыш-жаза кодексинин 280-беренеси (Бейбаштык) боюнча кылмыш иши козголгон.
Жабырлануучу Ысык-Ата районунун ички иштер башкармалыгынын тергөө кызматынын тергөөчүсү болуп иштейт.
Милиция кызматкерлери тарабынан кылмышка шектүүлөр 1989-жылы туулган Д.А., 1991-жылы туулган И.Т., 1989-жылы туулган Э.У. кармалып, убактылуу кармоочу жайга киргизилди. Учурда тергөө иштери уланууда.
Сүрөт: Чүй облустук ички иштер башкы башкармалыгынын басма сөз кызматы