Ысык-Көлдө жергиликтүү тургун ооруканалардан телефон уурдоо менен алектенген
Милиция жабырлануучуларды издеп жатат
Ысык-Көлдө медициналык мекемелерден уурулук фактысына шектелген жаран кармалды.
Ысык-Көл облусунун ички иштер башкармалыгынан билдиришкендей, Каракол шаардык ички иштер башкармалыгына аял кайрылып, 18-май күнү жеке менчик медициналык борборлордун биринин кабыл алуу бөлүмүндө белгисиз адам Samsung A34 үлгүсүндөгү уюлдук телефонун уурдап кеткенин билдирген.
Мындан тышкары, ошол эле күнү Ысык-Көл аймактык ооруканасынын хирургия бөлүмүнөн белгисиз адам Redmi 10 үлгүсүндөгү уюлдук телефонун уурдап кеткен.
Аталган фактылар КР Кылмыш-жаза кодексинин 205-беренеси (Уурдоо) менен катталган.
Шектүүнүн өздүгү такталып, ал Жети-Өгүз районунун Тилекмат айылынын тургуну, мурда ушул сыяктуу кылмыш иши боюнча соттолгон 26 жаштагы Т.у А. Болуп чыкты.
Соттун чечими менен ал 2 айга камакка алынды. Учурда тергөө иштери жүрүп жатат.
Милиция башка жабырлануучуларды: (0703) 332 166 телефонуна чалууну суранат.
Сүрөт ИИБнын басма сөз кызматы