Ырчы Асел Кадырбекова кома абалынан чыга элек
Бирок, ал өз алдынча дем ала баштаганы айтылды
Бишкекте үрөй учурган авто кырсыкка кабылган ырчы Асел Кадырбекова кома абалынан дале чыга элек. Бул тууралуу Бишкектеги Травматология жана ортопедия илимий-изилдөө борборунун директору Сабырбек Жумабеков Фейсбук социалдык тармагындагы жеке баракчасында билдирди.
Муну менен бирге дарыгер Кадырбекованын абалында бир аз жылыштар бар экенин белгилеген.
— Асел өз алдынча дем ала баштады, - деп жазган Жумабеков. - Кан басымы турукташып калды. Бүгүнкү күнгө карата кичине жылыш бар, бирок, абалы оор бойдон калууда.
Жумабеков журналисттерден кийинки маалыматтарды ырчынын жакындарынан алууну өтүнгөн.
— Бизге күн сайын журналисттер телефон чалып, анын абалын сурашууда, - деген дарыгер. Бул биздин ишибизге жолтоо болууда. Чалуулар менен биздин тынчыбызды албоону суранабыз.
Эске салсак, ырчы Асел Кадырбекова 26-июнь күнү Бишкектеги Медеров жана Тыныстанов көчөлөрүнүн кесилишинде авто кырсыкка кабылып, оор жаракаттар менен кайра жандандыруу бөлүмүнө түшкөн.
фото www