Садыр Жапаров Түркияда өткөн Дүйнөлүк көчмөндөр оюндарынын ачылышына катышты
Иш-чаранын алдында Режеп Тайып Эрдоган Кыргыз Республикасынын башчысын куттуктады
Кыргыз Республикасынын Президенти Садыр Жапаров Түркиянын Изник шаарындагы стадиондо өткөн IV Дүйнөлүк көчмөндөр оюндарынын ачылыш аземине катышты. Бул тууралуу мамлекет башчынын басма сөз кызматы билдирди.
Оюндардын ачылышынын алдында Садыр Жапаровду Түркиянын президенти Режеп Тайып Эрдоган тосуп алды, андан соң алар жана башка делегациялардын башчылары оюндардын ачылыш аземи өткөн стадионго барышты.
Салтанаттуу иш-чара түрк дүйнөсүнө жана көчмөндөрдүн маданиятына арналган театрлаштырылган көрсөтүүдөн турду. Оюндарга катышкан өлкөлөрдүн чыгармачыл жана бий топтору, анын ичинде Кыргызстандын 30га жакын маданият ишмерлери – «Камбаркан» фольклордук-этнографиялык ансамбли, солисттер жана режиссердук топ өнөрлөрүн тартуулашты.
Дүйнөлүк көчмөндөр оюндарына катышуучу өлкөлөрдүн парады өттү. Алар 29-сентябрдан 2-октябрга чейин «Биримдикти жана салтты сактайбыз, келечекке карайбыз!» деген ураан алдында өтөт.
Сүрөт www