Ошто райондук электр тармактар ишканасынын жооптуу кызматкерлерине прокуратура кылмыш ишин козгоду
Текшерүүнүн жүрүшүндө мамлекетке 1 миллион 372 миң 476 сом зыян келтирилгени аныкталган
Ош шаарынын прокуратурасы түштүк борбордун райондук электр тармактар ишканасында коррупцияга каршы күрөшүү боюнча мыйзамдын аткарылышын текшерүүгө алды. Бул тууралуу Башкы прокуратуранын басма сөз кызматы билдирди.
Алсак, текшерүүнүн жүрүшүндө Ош райондук электр тармактар ишканасынын кызмат адамдары расмий документке атайылап жалган маалыматтарды киргизип, ишенип берилген мүлктү ыйгарып алганы, тактап айтканда 2020 жана 2021-жылдары электр жабдууларын жана материалдык баалуулуктарды мыйзамсыз эсептен чыгарып салышкандыгы аныкталган. Ошентип, алар мамлекетке 1 372 476 сомдук материалдык зыян келтиришкен.
Бул факты боюнча түштүк борбордун прокуратурасы тарабынан райондук электр тармактар ишканасынын жооптуу кызматкерлерине Кыргыз Республикасынын Кылмыш-жаза кодексинин 210 (Ишенип берилген мүлктү ыйгарып алуу же ысырап кылуу) 1-беренесинин негизинде кылмыш иши козголгон.
Учурда тергөө иштери жүрүп жатат.
Башкы прокуратуранын басма сөз кызматы
Сүрөт www