УКМК Имамидин Ташовду мамлекеттик төңкөрүш жасоого даярдап жаткан деген шек менен кармады.
"Ал социалдык тармактар аркылуу активдүү аракеттерди кылып жаткан."
УКМК Чүй облусунун Панфилов районунун Кайыңды айылында издөөдө жүргөн «KG Групп» курулуш компаниясынын жетекчиси Имамидин Ташовду кармады.
«Ташов Кыргыз Республикасы менен Казакстан Республикасынын мамлекеттик чек арасын мыйзамсыз кесип өтүп, Алматыдан Кара-Балта шаарына бара жаткан жолдо, кийин бийликти басып алуу үчүн нааразылык акцияларын өткөрүп, күчтөрдү бириктирип, убактылуу штаб түзүүнү пландап жаткан жеринен кармалды . Буга чейин ал кызмат абалынан кыянаттык менен пайдаланууга жанан коммерциялык же башка уюмдардын кызматкерлери тарабынан бийликти күч менен басып алууга чакырык жасагандыгы үчүн мамлекеттер аралык издөөгө алынган. И.Ташов издөөдө жүргөндө бийликти басып алуу максатында калкты адаштырып, социалдык түйүндөр аркылуу жигердүү ишке орноштуруу иштерин жүргүзгөн», - деп айтылат маалыматта.
Эске сала кетсек, январь айында Улуттук коопсуздук боюнча мамлекеттик комитет “KG Групп” курулуш компаниясынын жетекчиси Имамидин Ташов, Тилекмат Күрөңов жана башка адамдарга бийликти басып алууга аракет жасаган деген шек менен кылмыш иши козголгонун билдирген. Ташов издөөгө алынган.
Сүрөт УКМКнын басма сөз кызматы