Камчыбек Ташиев Түркиянын Улуттук чалгындоо уюмунун башчысы менен жолукту
Ошондой эле тараптардын жолугушуусунда эки өлкөнүн коопсуздук кызматтарынын өз ара кызматташуусу талкууланды
Күн мурун министрлер кабинетинин төрагасынын орун басары - Улуттук коопсуздук мамлекеттик комитетинин төрагасы Камчыбек Ташиев Түркиянын Улуттук чалгындоо уюмунун башчысы Ибрагим Калын менен жолугушту.
Атайын кызматтан билдиришкендей, тараптардын жолугушуусу Түркиянын президенти Режеп Тайып Эрдогандын Кыргызстангаа жасаган мамлекеттик сапарынын алкагында өттү.
Жолугушуунун жүрүшүндө Камчыбек Ташиев эки өлкө ортосундагы көп тараптуу кызматташтыктын манилүүлүгүнө токтолуп, өзгөчө КР Улуттук коопсуздук мамлекеттик комитети Түркиянын Улуттук чалгындоо уюму менен биргеликте ар тараптуу атайын иш-чараларды уюштуруп, алар ийгиликтүү ишке ашырылып келе жаткандыгын баса белгиледи.
Ошондой эле төрага Түркиянын президенти Режеп Тайып Эрдогандын Кыргызстанга жасаган мамлекеттик сапарынын маанилүүлүгүнө токтолуп, мындай жолугушуулар эки өлкөнүн стратегиялык кызматташтыгын кеңейтүүгө чоң салымын кошот деген ишенимин билдирди.
Жолугушуунун жүрүшүндө Кыргызстан Түркия менен эң жакын стратегиялык өнөктөш катары, кайсыл тармак болбосун ар дайым кызматташууга даяр экендиги кошумчаланды.
Өз кезегинде Ибрагим Калын жылуу тосуп алуу жана меймандостук үчүн кыргыз элине ыраазычылыгын билдирип, Түркия лидеринин Кыргызстанга болгон сапары алар үчүн да өтө маанилүү экендигин айтты. Ибрагим Калын өз сөзүндө Кыргызстандын улуттук коопсуздугун камсыз кылууда УКМК төрагасы Камчыбек Ташиевдин орду чоң экендигин белгилеп, өлкөдөгү Уюшкан кылмыштуу топторду жоюу жана аларды каржылоо фактыларын жок кылуу аракеттерин жана чек ара маселесин чечүүдөгү чечкиндүү кадамдарды мисал келтирди.
Ошондой эле тараптардын жолугушуусунда эки өлкөнүн коопсуздук кызматтарынын өз ара кызматташуусу талкууланды.