Туманбаев "Ынтымак Ордонун" курулушуна 2 миңге жакын индиялык жарандар тартылганын айтты
Ал буга кыргыз курулушчуларынын жай иштөөсү себеп болгонун айтты
"Ынтымак Ордо" резиденциясынын курулушуна 2 миңдей Индиянын жараны тартылды. Бул тууралуу бүгүн, 21-ноябрда президенттин иш башкармалыгынын башчысы Каныбек Туманбаев маалымат жыйынында билдирди.
Ал буга кыргыз курулушчуларынын жай иштөөсү себеп болгонун айтты.
"Биз болушунча өзүбүздүн жарандарыбызды иштеткенге аракет кылабыз. Бирок биздин жарандар убагында курулуш иштерин бүтүрө албай жатат. Ушул объектти салып жатканда 2 миңге жакын индиялыктарды алып келгенбиз. Бул боюнча эч качан өкүнбөйм. Алар кара жумуштарды аткарганга тартылды. Биздин кыргыздарда той көп, анан чөп башталат. Эки жакка кетип калышат. Өздөрү бир мөөнөттү коюшат дагы, ошол учурда бүтүшпөйт. Курулушчулар алмаша берет. Чет жактан алып келгенибиздин дагы бир себеби бар, алар ошол жерде жатышат дагы, жумушту өз убагында аткарышат", - деди Туманбаев.