Депутат Жолдошбаев ИИМнен: «Күйөөлөрү өлтүргөн аялдар өздөрү күнөөлүү болушу мүмкүнбү?»
Ички иштер министринин орун басары Памир Асановду Жогорку Кеңеште окуучуга теңешти
Жогорку Кеңеште бүгүн биринчи окууда «Үй-булөлүк зомбулуктан сактоо жана коргоо» мыйзамына өзгөртүүлөрдү киргизүү каралууда.
Талкуу учурунда ИИМнин башчысынын орун басары Памир Асанов 2019-жылы үй-бүлөлүк зомбулук боюнча 8159 факты катталып, алардын ичинен 7045 токтотулганын маалымдады.
- Адамдар тосмо арыз жазышат, мындан улам токтотулган, - деп тактады Асанов. - 554 материал сотко жөнөтүлгөн. 4 миңден ашык зомбулук фактысы мас абалында жасалган.
Депутат Дастан Бекешев аялдар менен балдарга карата жасалган кылмыштардын санын азайтуу үчүн алкоголдук ичимдиктерди сатууга чектөө сунушу менен чыкты.
- Мага белгилүү болгондой, зомбулук билимдүү, колунда бар үй-бүлөлөрдө деле кезигет, бирок, көбүнчө мындай учурлар жубайлардын бири ичимдикке берилгенде болот, - деп белгиледи парламент мүчөсү. - Балким, ордер алган жарандарга спирт ичимдиктерин сатууга тыюу салуу зарылдыр? Же болбосо алкоголду сатууну чектөө керек.
Башка депутат Камчыбек Жолдошбаев өкмөттүн мүчөлөрүнө «Өлтүрүлгөн аялдар өздөрү күнөөлүү болушу мүмкүнбү?» деген суроону узатты.
-2020-жылдын башынан тарта резонанс жараткан үч факты катталды, - деди эл өкүлү. - Буга чейин ал аялдар милицияга кайрылганбы? Үй-бүлөлүк зомбулуктун себептерин изилдейсиңерби? Аялдар өздөрү күнөөлүү эмеспи?
ИИМ башчысынын орун басары Памир Асанов 2020-жылдын башынан бери күйөөлөрүнүн колдорунан ажал тапкан аялдар укук коргоо органдарына кайрылышпаганын айтты.
Жолдошбаевдин суроосу Жогорку Кеңештин вице-спикери Аида Касымалиеваны кыжырдантып жиберди.
Ал ошондой эле, үй-бүлөлүк зомбулуктан жабыркаган 8159 адамдын ичинен канчасы аял, канчасы эркек экенин айта албаган Памир Асановду дагы сынга алды.
- Сиз начар даярданып келиптирсиз, мектеп окуучусуна окшоп жооп берип жатасыз. Бул жерде аялдар өздөрү күнөөлүү эмеспи деп да жатышат. Ушундай кантип суроо болсун? - деп ачууланды ал.
Зулайка Эркимбаева
Фото www