Араванда агитация учурунда массалык мушташ. "Мекеним Кыргызстан" партиясынан депутаттыкка талапкер суракка чакырылды (видео)

Мурунку күнү Араван районунда пикир келишпестиктердин натыйжасында “Мекеним Кыргызстан” партиясынын агитаторлору менен чогулган жергиликтүү тургундардын ортосунда массалык мушташ болгон. Бул тууралуу Vesti.kg сайтына Ош облустук ички иштер башкармалыгынан билдиришти.

- Кечээ саат 19: 15те массалык мушташ тууралуу билдирүү келип түштү, - деп билдиришти милициядан. - Бир партиядан депутаттыкка талапкер Араван районунун тургундары менен жолугушуу өткөрдү. Ал жерде 100гө жакын адам болгон. Ушул учурда чогулгандар менен агитаторлордун ортосунда пикир келишпестиктер келип чыкты. Буга байланыштуу мушташ болду. Натыйжада 12 адам ооруканага кайрылышкан. Алардын бешөө бүгүн эртең менен ооруканада дарыланып жатышат. Калгандары керектүү медициналык жардамды алышып, үйлөрүнө кетишти. Мушташка катышкан 30 адамдын бардыгы суракка чакырылган.

Белгиленгендей, депутаттыкка талапкер ошол эле күнү кечинде суракка чакырылган.

- Үчөө убактылуу кармоочу жайга камалды, - деп улантты Ош облусунун Ички иштер башкармалыгында. - Сотко чейинки процесстер башталды. Тергөө иштери уланууда. Алынган жаракаттардын оордугуна жараша соттук-медициналык экспертиза даярдалууда. Мындан тышкары, беш унаа бузулган.

Араван районунда массалык мушташ болгон видео Интернетте бир күн мурун тарагандыгын түшүндүрүп берели.

Медина Купсулдаева
Сүрөт www