Акыркы коңгуроо күнү балаңызга унааңызды бербеңиз!
ЖКККББ ата-энелерге кайрылды
Жол кыймылынын коопсуздугун камсыздоо башкы башкармалыгы бүтүрүүчүлөрдүн ата-энелерине акыркы коңгуроо күнү – 25-майда балдарга унаа бербөө өтүнүчү менен кайрылды. Бул тууралуу Ички иштер министрлигинин басма сөз кызматы билдирди.
Башкармалык жыл сайын бул күнү мектеп бүтүрүүчүлөрүнүн катышуусундагы кырсыктар көп катталарын белгиледи. Акыркы беш жылда мындай кырсыктардын көбү 2021-жылы болгон – анда бүтүрүүчүлөр катышкан 29 жол кырсыгы катталган. 2022-жылы 17 жол кырсыгы катталып, анын кесепетинен өспүрүмдөр жапа чеккен. Алардын арасында өлүмгө алып келген учурлар да бар.
Жол кыймылынын коопсуздугун камсыздоо башкы башкармалыгы ата-энелерди бүтүрүүчүлөрдү кароосуз калтырбоого, аларга уруксатсыз жана укугу жок унааларды бербөөгө, ошондой эле бүтүрүүчүлөрдү бейбаштыкка жол бербөөгө чакырат.